همــــــس الـســــــــلام

همس السلام

.........

لو بهمسه مري وسلمي

يفتح الريح دعاشه

الشوق يلاقي  طعمه

جايك من نبض المعاني فاتح سري مادي وصله

عند مداخلك سجد ركع ركعتين رافع فرضه

خاطب الرزاز كلامه

سلم زي همس سحابه

لما تميل الدنيا تنعبر بأشواقه

من بعييييد ناضمك .. فوض النجم سلامه

وناداك زي أول وأخره .. نده

سلمي لي علي عيونك يا أميره

قولي لسحر البمرح خلف ضحكاته العنيده 

في ضفافه   

بين ابتساماتك الندية

لسه فيك سابح

هادي أشواقي الحنينة

لسه بشرب من رحيق

ساقي عطشي  المراقب

لسه عطشان ليك واقف 

فجي ضفائرك يا جميله

زي طلوع الموجه مره

راسمة الدنيا جميلة

شايله  قلبي بين يديها

خائفة من الدنيا عليه

واقفة تلفت غزاله

جادعه سهمك نظره

رمشها ا جارح سحابه

كل ما تبراها  الريح

تشيل  ابتساماتي  لهفتي عليها

أبقى غرقان في مشاويري ليها 

يبكيني  الريد يفيض بشوقي ليها  

تفرح أنفاسي يطل في جو بريقها

قدر الشمس وكتين تطلع بهية

بتشرق الحياة جميلة

سلمي لي عليها مره

ارفعي الحاجب دهشة

الشوارع تصطف في هاتفه مره

كل زول ياخد نصبه

الجمال يغرق حته

يستلف الحب المحنه

تطلع الشمس من مقامك فارده صبحك

يمدي الطير جناح  شعاعك

تنكسف الغيمة الحزينة  

ترجاك المدائن عطشان فرحه

يوم تشاوري علي مره

يكلمني  البحر بصمته

يحدثني  وكتين وقعت عيوني في عيونك مره

ضجت كل الكهارب ولعت مدن المغارب بنوره

قدلت في ممشاك المحنه

كل زهرة في ضفتك طلت ضحكه

تخبر الشوق أهلنا تقبل النحل محبه

تسرج الضوء البعاند فانوس ولمبة  

الشارع يراقب عشقك يا بنيه

جايه  زمن الأصالة

ثغرك الكاشف حقيقة

روحك الطاهرة مدينه

القمر من فوق ساحب يتونس برزازه

يطلع مره يدسه مره

يدينا الهمس تراضي يسقط الهم مره

العشم يفتح بابه

آه لمن يطل ميلادك .. بنيه

يقف حسي بهتافه

نشاور لشعاعك كل مره ننده

يا جميله سلمي لي علي عيونك

قبل ما تطل من شباكي مره

قوليها نحن لسه في طريقك فاتحين سكه

زي مراكب بشوق تمشي والجو فارض همه

أو قمر في سماه راحل ماسح الدمعات هسه

أو قليب نديان بحبه بدق نبضه

زي طفل في ثدي امه

ضميه الشوق موحد بحبه

أو مسيد بتقابه بضوي ذكره  

كل القلوب مليانه  رايده حسنه

كل الخلق فارده قلبا مصلي عشقكِ

الطفل الصغير كايس هدمك مشتهي عطرك

لافحة كل النسائم بالشوق ما خاتي دربك  

من رقيق حديث كلامك أو همستك

أو وكتين تطوفي داخله طارحه فرحتك وبسمتك

يضوي في فريقنا بنور محيك  

ينطط فينا الحب نشتهي  أرضك

أو وكت تنادي والعبره فايته حلقك غادك

أو زي نور سلامك

وكت تحضني وتقلدي ويرتاح همك

تفرهد دهشة من صدري لصدرك

أسرح

أفرح

أبكيك

في غناكي نهدي الدنيا رسمك

يطرح الشجر ثماره يبقى أسمك  

تنفتح كل مدخل والمخارج في هتافك

يا خد الشجر رضاك

النيل يسقي عرشك

تهتز الأرض بوجدك  

يا فرح أبواب كل المدائن من ترقبك

يا فرح كل بيوتنا وكت الريح تحضرك

يسلم أسمك

سلمك

رسمك

وأنا جاي من ترقبك

يا إيماني البنادي في سماءك  

يا هاتف في حلقي ليك واصل

بكره نسرج الشمس مقامك

تهمسي

تضحكي

تمرحي

عينيك لينا تشرق بشوق تسالم

الريد فيك باقي لينا راجع فيك راكع

تمري تسالمي ترفعي الريد معاني

تصحي فيك المدن تسالم وتسالمك

توزعي بطاقات عشقي وعشقكِ

يطلع الريد سلام من عيوني لعيونك

يهدي الأرض سر حنانك

نور محياك

صحوك

تبقي الشمس أنتِ وأصبح الريد أنا يكتلني حبك

6 يناير 2014

بقعة ضوء

بقعة ضوء

..............

يا مهمومة

ماسكة عصب الحال

شخبطي  براحة يدكِ

علي صدر الريح

بين صفحات الموج .. كمان

ما يطش زمانكِ بالحال

يستدعيكِ دغش الأفراح

تلاقيِ الحظ المايل راح

تشوفي

نشوف معاكي

الهم ينتف يقطع .. يتناثر خيوط  رهاب

 يلوح من بعيد يرحل بإسراع 

بين خطوتك وخطوة تنبت حقول

تعاين الريح من خشيم شباكِ

تقرقر وكتين تطل النجمة

تبق في سماء الأحزان أفراح

الريح عنيده

يا ... بنية من دغش الفرح الجاي

صلبه ورشيدة

وكتين  تصادم

تصادمي من جوف العطش الهتك الأزمان

لا من يرتاح ضميره

هي عنيده

جميلة .. زي محيط لما يغرقك حنينا

تفرهد في كل النسائم

في عيونكِ  لعيوني بساتين تحلق طيورا  ..

طل يا زمن

بشري الليل وزعي علي مسامعه بطاقات الصباح  

هداك بقدلته

زي لمح البرق جاي

ناصب قامته

فوق الشجر

باقي من جبهته شعاع

زي عصفور فرحان بين الأغصان

زي نحله لما تحاضن رحيق  الأزهار

بطل النورا

يطلع من مشارقك ضئ يفتح كل الأبواب

الريح والنيل أخوان

زي حقل وثدي المطر كمان

والجامع بيناتم ألفة بحدودها  يمتد سؤال  

لما نفتح دفتر الأزمان

الريح عرض

النيل شقيقا كمان

لا بنوم طفل بين ثدي أمه جعان

لا يرضى نواحك يا شجر  

تضحك القمره  تبقى كلام

تمسح بخفه تطيب جسده كمان

يرتعش ينداح ضحك زي سعة الأزمان

يستف مراكبه يمد علي المدى شراع

 تسافر القمره شوق

تضوي  جسده زي ضئ يراع

تمطر سحابه دمعة  كلها حنان

لا حزن يسكن

لا فقر يمشي

جوه بوادي الترحال

لا أشواق بحدك أنت يا حال

ترقص النجوم

يبقى زمن هو الحال  

13 يناير 2014