دغش

دغش
.......

ما ودر السأل ساساق الدروب
شجر الحراز الواقف عليك يا درب
شن الخطوه معناها
وكت ترجع تقبل وشيشا
الدنيا ليالي خوف
البسمه عز رحيلا منى المنافي 
وجع
تصب ليالي الشوق 
سرقت الفرح وجع 
ندمانه تجفف دميعات الدروب
خاطرك يا نيل سرح 
فوق ضهابة دروب العطش
شجرِ النخيل الطير الهجر
خاطرك يا قمري قوقي
زي النيل وكت يلاقي عطش عينينا
أسف الحصى عيون تحلم بباكر
أسف الخطاوي يا عشيش بوم الخلا
مافقس جبال الخوف وكت سكن 
أسف الضفه وكت تعاين شوق الشمس
أحلام أطفالنا القادي
قومي يا ضوه 
ضوي رتينة الفرح برنده
حد الشارع الواسع صبر
أتفتحي ضلفتين شوق
للناس الهناك الناس الهنا 
رسلي مراسيل البعاد 
همس نسائم النيل
رتبي خاطر الشوق بلد
نديانه بعرق الجباه 
نيل مستف غناء
رشي كلمات الرجعه 
فوق سنابل الهتاف الفوق
فوق حليق مشرور بجفاف 
الوعد تحت جبال الكتمه
عند عتمة خطاوي الليل
سحابكِ نيل 
برقاً عبادي 
مطراً  جو 
يلملم صريخك يا حراز
وجع أنصاص الدروب
سلام وأمان
لسان بحسب ثواني
فرض مشدود  وصاحي 
يااااااا  ..بلد 
رجفت طواقي الخوف
نهارات السؤال وضوح 
وزع نجيماتك يا بلد
وزع نسيماتك يا دغش
وزع  شبابيك الهمبريب 
النيل سلام علي خدين


27 نوفمبر 2015

عيونكِ

عيونكِ
..............

والله ديل عيونكِ
لوحة الفرح المهاجر
فارشة للناس سلامه
تتشابه لأمل الدوام 
لقية الحرف المعاني
كل ألق الجمال 
بين أبواب عيونكِ يا مكان
من غيركِ مدائن
تهدي للناس دعاش
من غيركِ بكوس 
بين زحمة النفس الهجير 
انده في خاطري وأشوف 
عيونكِ تفتح المدن تلاقي
تفتح شفق المخاض 
موكب مهرجان
بينك ولسه في نداءك 
بينك ولسه مسمر حارس للهواكِ
من جزع الليل
لمح الوجع المحال
لا مليت أحتواني
اسف الإنتظار 
لا ضائع خاطر
بين شرودكِ ورضاك 
مين ببقى من غيرك ويكون
إلا  ظالم وريد هواكِ
جهجهة النظر السراب
انتِ يا ليل السؤال
شمعة الخافق صباح
صدى شوق الضفاف
بهجة النيل  يا زمان
نادي  طيور البنفسج 
روعة العشق الخرافي 
بهجة الفرح المرافي 
لاقي عيوني انتظارا 
افردي الفرح المسافر 
فوق بساط عيونكِ
البسي ضحككِ وشاح 
يا ... مدائن
فاتحه أبوابكِ سلام
زي رحيق ندأك
لما يحتوني فيضه 
الكحل نوُره الهلال 
الشمس للقية سلام
الحزن عويل المنافي 
رقراق الشبابيك  أمل
مهما طال عمر الإنتظار 

4 نوفمبر 2015

شهيق .. عصب

شهيق  .. عصب

............

زوله من طمي العجوه
معطونة عسل
تدفق ...
قبل تحلف تِشْهَد 
يشهق عصب راسك 
تبق روحك بدهشة 
زي الورده تعشرق ليك حلاتا 
بخفه فاح هواها لاقا هوانا
الأليفة روح هوانا فرحة لقا
الأليفة هجعت ليلنا السكن
الجميله فرح الليالي السكنت
عصب روحنا طوت أيامنا وضحاها 
سكنت حروف شوقنا 
مد مداخل الإلفه حارساها 
زمان زرعوها في حشاها
يخجل النسيم وكت يغشاها 
الجميلة صباحات الشروق 
وكت تلامس أرضنا 
وميلاد صبرنا
عمرنا الرحل سكن نفس دربا
لا نام لا اتخلله وكت وهجع
الجميلة صباحات شمسنا
وكت شعاعا يصل
توزع مسامات ريدا
تقنب وسطنا ضحكاتا 
كل الناس طارياها
وكت تضحكِ تشق الظلمه
يخطف برقا الناس الحداها
تتمايل يميل فرعيا معاها
زي النيل وكت يسرح 
تسقي البعيد والجالس حداها
ضامر نهيدا  شايل ورامي عنابا
تنقط .. حروفا عسل ترسم كلماتا
سوايا  ما حداثه
صفاء عينا بحر 
مراكب تائه بشوق سنبن
بعيد ضفافا 
عالي حاجبا مضوي هلالا
الشوق مرسوم بجانبين 
الناس بالريد وحلانين حداها 
مخلوقه ولله براها
هلكاني البريدو وصالا
الخمري لونا الحرير شوقُ أيديها 
الحنة الليل سوادا توسل نجوم عنينا 
الوناسه همس النسيم لذاتا
تشيل وتوزع بشوق نظراتا
البسمة نارا 
هلكاني الظبيه الرشيق قواما
كل ما تعاين تلفحني بنارا
تضحك تلمني بحنانا
كل مره تجذبني حداها
السمحه ذاتا 
الكحل أسود عالي  هلالا 
مضوي بحر عيونا
الغمزه حلاتا 
الزارني طيفا 
بخفه حرق حشاي 
ما صبحت غير سكني  رمادي
طوف يا جيدا
الخطيوه إيقاع 
الفرح شبالا 
كل ماتمشي ترقص حلاتا 
بشوشه مدخلا فرح  
البهجة محكره حداها 
معجونه عجوه  عسل
وكت تطلع قمره النجوم إنتظارا
تعال قبل الوقت يضم جناح
تعال يا هواجسنا الرحلت
بين سهاد الليل عويل 
تعال في زفة ندى بدايات الدخله منى
يفتح الشوق بابه يسهر بينا زمان 



21 نوفمبر 2015

شعاع حزن

شعاع  حزن
..............
لما إنفتح باب الحزن
سالت دمعة سقت خدين
إنبسط علي درب المسافات
شوق .. سؤال حفيان سنين
جفاف ماعدمان مطر
لوعة حبالنا الصوتية 
حزنكِ فرهد 
فوق مداخل الضئ 
ضئ عينيك ِ ..  شعاع فرح
حزن مقلتيكِ .. حديقة 
هجعت طيور المنافي
الليلة جاءت لمقيله
تغني الليل المسافر
لشعاع وهج دخولكِ 
موسم الفرح فصولا
السماء صفاها النجوم زهورا
اطلقي الضحك المتربس 
ألق نجوما كل اسواركِ نطولا 
حراب بين ضفتين
النيل بصفاه يصونا
تراع ممتد طولا
يحلق الطير المهاجر 
فوق نبعكِ يعشش الفرح سنينا
يبقى ضحكا وإبتساما 
وصول شوقنا المسافر 
لحظة الهمس الجميلة
شوقً محروس بين جمرتين 
مطري انتِ من تاني بلي عروقنا
اعجني الطمي محنه
ابذري الفرح يا حديقة 
كل لحظة دهشة فينا
أطلقي الخيل العنيدا
بسهامك احرسيها 
مرة مرة أغمرينا
فصول طمي موسم دميرا
لبسي النيل حريرا
ضمي الشوق سالمينا
السحاب مابهرب ويخلينا
بعود من تاني يتولف
من نظرتكِ يهمس يسقينا
تفرح الارض يرقص نخيلا
نفتح شبابيك الكلام
الحب المدفون فينا
فوق دمع نبعكِ يطوف الحمام
القُمري يشجينا
يقوقي  من تاني فوق أبواب  مصيرنا
فرهدي يا غصون
الرقراق بفتح شبابيكِ 
موسم غنى
إنتِ عبرة الدمع الحنبن
وكت تطوفي تسقي فينا
حزنكِ وجع المنافي
صرخة الزول البصارع
للشمس تشرق  بجديده 
خطوات أطفال مدارس
عيني في كحلك حديقة
قوس الوان جميلة
أطلقي سهامكِ فرحينا

07  نوفمبر 2015