في هواك انتظار

في هواك انتظار

ـــــــــــــــــــــ

كيفن بتمرِ علي من غير سلام ..

حتى لو غلطت في حقكِ واحتواني الملام ..

برضو أنتي في عروقي عايشه..

مدية صوتي الكلام  ..

قلبي  بطرح حولك سؤال ..

اصلو ما غبت عنك بإرادتي بس مرات الحظ بشاتر ..

كتير يملانا ببعاد ..

كل الزمن بسمع  وكت يضج شوقي

 وأنده عليك من حشائي ..

كتير  دمعي بسيل لما ما يسمع نداءك ..

يتردد الصدى يسكن بيوت الفراغ ..

بجيني الحزن  يشحتف روحتي يقرقر عنين سهر بكاي  ..

أقعد بين الخلق أزازي

زي درويش حائم شايلك ينادي  ..

بريدك يا عمري بدورك زي نفسي وكت يعاود يملا حنين جواي

طلعة من عيوني بتاوق فارشه الريد  وجودك ..

من غيرك أعيش سكوني  ..

بوحشة  الليل الطويل والهم يدفق من جفوني ..

ما تسألي في غيابي تقولي بتعزز علي

أموت في اللحظة  أخت بين  يدك دليلي ..

ما أنتي منى عمري رغبة حظي الجديد  ..

أعبدك وابقي للناس رسولك بريد أصبح دليلك ..

كيفن أتكبر  ومقامك فوق للنجوم يطوف ..

مهما طال عمري و أتجملت  فوق العمر سنين  ..

ما بعرف غيرك أكون احرسك وبورحي  حولك أطوف وأدور ..

أنا عمري ديمه في رجاءك كيفن أطاول وأطول ..

 مقامك يحلوه بشيلو   منه بنات الحور كمال وجمال رقة سكون  ..

 كل الناس قاصده في ريدك تكون ..

أنا قاصد جمال الروح والهمس الحنون ..                                    لما تحكي عيونكِ 

بريدك أسالي الريح البوشوش فوق خدك يمشي ولي يعود ..

أساليه مره مره  أسمعيه  لما الخلق تهجع تنوم ..

 اسألي ليلك لما أكون حفيان حولك أدور ماني مجنون ..

أسالي شُباكك لما الليل يضلم بنورك أصطفيك وأكون ..

أسالي ألقمره الحاسبة خطواتي لما أمش منك أعود..

اسألي دروب العودة ديك لما منكِ راجع ليك من جديد ..

 أساليها برجع صداه بقوليك ..

كتير يا بنية  حلوه ورزينة الخجل غازلك حقيقة ما صدفة طريق ..

كتير علي صوتك بنده ليك ألله بقربك يكون..

ما تصدقيها ما تعير انتباهك من جديد ..

اسألي الشجر مره بقول ليك في ورقه كتب كم من قصيد ..

أسالي رمل المسافة اللسع بينتنا يعاين ..                                    ديك شمس الله شاهدة كم كتبت جواها مزيد بحرف دمي السايل .. 

بشرح ريدي وكتين أهيم في انتظاركِ ..                             تحت نيران الشمس حايم .. 

كيفن ما أكون..

شوقي يحلفني  اصنع منك مزار أطلق من حولك بخور ..           تمثال للناس باين .. 

 احرس رضاك  صفاء روحك ومنك كيفن أفوت..

يا حلوه يا غالية المقام ..

يا نور بفتح مسارب الضئ ..

يا نبع وعيونكِ الحقيقة تجري بشوق رسول ..

نضمك صادق بطلع وهج ..

يا واقفة فوق عصبي الحي ..

ناقز نوركِ في الظلام ..

 يا فاتحة جواي اندهاش ..

ردي من عصب الحس البعاين ..

رابط جوانا المسافات البعاد  ..  القرب منك مكان .. 

أديه شويه نضم ..

أفتحي كل المداخل ..

أمنعي سرحت الهجير بتشابك فني وتقاوي   

ما تخافي عليه من المسافة

أو حاولي ردي من شوقي ألي ملازمكِ شويه ..

دفقيه في حجر الزمن البقاوي ..

ماني  بخاف علي  قلبي بين يدكِ يموت أو يتهمل شويه ..

ما بتذبل كل العصافير الجاية فوق طرقنا  ..

كل الشموع ترقص تضوي من بريقك ..

تنادينا من مسافتنا وتطل من عيونك كل  الحقيقة ..

حلوة رشيقة ..

لما تفتح مساماتنا حديقة ..

كل ورده تطل تملى منكِ أيدها ..  

تهديك نبع وريدي

عادل البراري 

30 نوفمبر 2013

إزاعة موقع الراكوبة

لقطات من فيلم عن اليهود السودانين ... Sudanese Jews

مرسال

مرسال

ــــــــــــــــــــــــــــــــــــ

ما ترسلي سلامكِ ..
همسة من الشوق وصالي..
شفنا كيف شقة البرق البزازي من خلف السحابة..
شفنا كيف لما النور بسطع يضوي ليالي التعابه ..
الشوق بردح في عروق المطر السابق لمس قلبك يا أرض ..
يا .. بنت معايا في شرياني حكاية
زي جية السحابة هي بت عنيدا من ضفائرها تبدأ الحكاية ..
أمل زولاً في سكه حاتل يصيح شوقاً ..
يطرح حنين قالت زي ماقالت مره قالت ..
أنا أصل ما أمل إلا لعيون الغلابة..
بسمة الطفل لقراية ..
لما افتش تزغرد عيونك معايا ..
إني بإيماني راسخ بمشي لنهاية الحكاية..
ده بنت عنيدا شاقه الليل ضفيرة فارضه في جونا الحقيقة ..
لو بقت في وريدك حرقت الزعل العنيد ..
نقلع عيونا نبقى نفتش لعيونكِ سلامه
رغم كل الحكاية الزمن ما بشرق بضحك معايا
أصلو قلبي في الريد عنيد زي ضحكة رنيم معايا
قومي رسلي  سلامك

خلي الغيم يتوانس معايا

كل ما النيل فرد جناحه

النخيل يتشايل سبيط

يطلع معاي رسول يكلم الناس هوايا
تبقي إنتي مداراتي عيوني

كل المسافات البعيده

تبقي طالعة معايا في زحمة أيامي وعيده

تناديني عيونك يشرق نجمك حكاية

ربي خلق من عيونك حكاية
تذهل المارة عيوني المعايا
ويا سلام لما يجيني سلامكِ
سلام .. تحتيه كلام

مستف زي النيل تمام

لا تمومة جرتق

لا نسمة شائلا نهار

بس مدفق مالي الحيشان سلام

قادر بي السواك حسن مقام

كل الناس تطوف رايده السؤال

عيونك يا السمحة قادره

مره مطر

مره دعش

مره في المرات برق يشق صدور الرجال

أنتي يا ست الحسان

مرات كايسك بين ودعه

مرات ضارب الرمل كمان

مرات بزازي بين خلائق ألله ... غبيان

يسقعوا فيني المطاليق المخازيق

الدنيا عين نهار

ما هماني

حالي حارسك حارين

النيل موصد سلام

26 نوفمبر 2013

وعد

وعد

............

وقفتي ...

بيني وبين السكة

رافعة تحية

بعالي صوتك شهدتي الحتة

نططي عيونك بقت منك مليون فرحة

ولعرش السماء مديتي يدك لمستي

صنقرتي وقعدتي

بين تراب الأرض ..

وضعتي يدك ..حلفتي

قولتلي

قبل الشهقة تفج وتسرح لغادك

فوق دروب عروقي

قولتي يشهد الخالق

النبي .. الناصح

بحروفي برسلك

قبل عيون الشوق ما تصحى

بضربلك بوصيلك

ضحكت عيونك سكة مسافة

بين صدق الرؤية جلستي معانا

إتخابرنا ضحكنا .. كذلك

حتى سنونك بانت معايا

أتوسدنا كلام من جوه

شلتي عيونك رحلتي يا الحلوة

مين تأني بنضم معايا

أصلوا كلامكِ بزازي بيا

 مره نازل مره طالع

بين النجوم بغشاك

بقعد بسرح فيك شوية

تلاقيني الملائكة

ماشه في فرحك مدخل

أنتي كوكب دري تشاوري عليا

بغمزه منك تقولي

هووووي .. يا الحبيب

وعدي قائم زي ركائز السماء

حاملني ..

أنت معايه أو بعيد عني حاريني

برضك وأعيني

والله الشوق خاتمني

بالكلام ما بقدر أعيده من تأني

يا حبيباً

بشهد الخالق وعدي قائم

وين روحي بعيد عنك تلاقي

بس .. تزازي 

وبريدك تهابش

زي النسيم جاني كلامك

إتحكرته في بطن الارض

لمست عصب كل الرمل

شالني فرحي لغادك

روحي تسألني مره

مره ما تسألني

صحي مشتاق

ساعات الزمن وقفت فت مره

أتبكمن دقائقه كمان

بقت متل المهبوشه

بسم الله .. من صبح رحمان

حارنه ..

زي حمار العمده العاير

يتشوبح في الطريق ويعاين

قدر ما ندفه

يتشبث بمكانه يعاند

ينهق كمان في الفاضي

كل ما تمر دقيقة

أشوفه في مكانه واقفة وتعاين

حرم يا فطره قلبي يا السمحه

من بعد خطأك شالا الريح

وقفت كل الدنيا

حتى الزمن رفض المسير

متين وكتك يطل بجيني

بوعدك أكون

مميز مرتب في كل الفصول

الزمن الحالف يمين ينكسر

يبدأ العد من تأني ما يزيد ...

فجاءه بقدرة قادر

نامت الشمس

قفلت  شباكا شفق المغيب  

أتلملم الغيم وصل

جاء معاهو المطر

الطريق كان مسدود

والطريق لسه مسدود

  بزحمة كل الناس رفض يفوت

الدنيا كبه فيها المطر

والطريق لسه مسدود

كبه الغيم كل المطر

إنتي في جواي نور

باقي في دمي مسروج

البرق يلفح .. يشق قلب السماء نصين

رعداً يسوي الكو

أنا أصيح كل الناس تصيح  ..

يا ... شيوخ الزمن الغافلين

وانتي تقرقري في جواي نور

يا ... وسخ الطين ..

يا ... رب العباد ناس ما منصوفين

أنتي تقرقري برضو في جواي

نور .. نور

انشغلته ...

غبت عن حضرة الزمن والناس 

وسط ضحكاتك عشته سنين

بين وعدك وزمنك كنت سنين

فجاء دخلت رسالة

الناس في الحته معايا

أتكبكبت.. أتبعثرت مش شوية

الصوت يسوي رن رن رن

بلحظة قادر

كل العدة القدامى .. صبحت مكنوسه

في بطن ألأرض بقت مدروشه

ما هماني ..

ما هماني

قزاز أشتت ولا رنين من غادك

إلا عيوني تلقف الجاي    

زي الملقوف ..

وكت يطلع لعيد مدهوش

فتحت الرسالة

جاءت  ناطه زي الرصاصة المغبونه

خابره قتيله

نقدم ليك عرض يوماتي

معلون ابوك يا خدمة

ملعون من رسم حروف ..

تلك الجاية من جوه

قعدته أعيد ترتيب الحته

كل الناس عيونه تلاقف حته حته 

بين السكر ورمل السكه

كل الناس مصبوبه صبه

يشهد الله سمعتك وسوستيلي

قلتيلي أنا عشطه

مهمومة ملياني خرمه

يشهد الله صوتك طلع من كل حبة رمل فيك

وقلتي : بشيتك عملته فيني مكانه

ترترب نطيت من طولي وعرض

بعيد وقفت منك مافي مسافة

إتلفته بسم الله .. قعدته ..

أخواني شاوروا عليا

يا راجل أجمد

لسه الدنيا بداية خريفية

بكره الشوق من عيونك حتى عيونا بطلع

احمد جابر لسه غائب

وقفتي جوه خاطري وتحركتي

الصبر مشبع نفسي ماليني

أتذكرته كلامك لي

وقت من جوه قلبك بطلع

ما خد منه اللون الأبيض مساحة

أتذكرته لحظة قعدنا واتفقنا

قلنا الأهل الوطن الجوه

والجار تميمة حظ

لمة أهل هي الفرحة

شلته يدك فوق يدي

بريدك أتودعنا

ساقت الريح خطواتك

أنتي  جواي ريدكِ محطة

بركب منها بنزل فيها

ولسه الكون ضامي الفرحة

أتذكرتك إنتي من بعيد وكت بتشاوري

بكل لحظة بتعايني ليه

في خشم عيونك كل الناس طالع منك

من تأني داخله

أنتي بالفرح باشه وراضية

لقدام  برضك جاية باسمه

تعايني و قولتلي

شن نسوي الوطن أهل

الجار الحظ الباقي لينا

اتذكرتك وكت تملا عيونك

بدمع الغالي

بخافق الريد اشرب منه

أتنحنح أقول حمداً سيدي

تفردي حجرك لي وساده

من خشيم ودعه تغنينلي

باقي جمره أخر روعه

رسمه الخالق فيك

قالوا حولا

ما خالق منك زوله سمحة

لونك قمحة

سمحه فيك اللفته

كل الدنيا تشهق فيك يا خطوه

لكزوني أخواني وصحوني من تاني

كلامم لي جفلني وخجاني

ها يا الأخو

وينك في أي بلد سارح

دحين في وجودنا ما متابع

لا رامي فينا  سائل واصل

ضحكته

وزدته في الضحك رشاقه

من تأني طلعت نورك جوه

عمت ضوت الونسة فينا

الزمن إتحكر معنا

رفض يتحرك من تأني

زعل الرعد أتفرتق بره

عاد البرق يضرب يشق الظلمة

حتى وصل بقه المجلس فينا

شوووو .. مدد المطر رجليه وأترهل فينا

كنا جماعة

كل الناس يزيدوا معانا

أنا برضي شايفك في كل الحته

شفته عيونك لما تغمز ليا

وتسألني بطول المسافة البعيدة

زي البرق تعمي وتفجي

ولسه ببحلق بشوفك حته

ضاوية ساده راسمه السكه

من وسط الناس قمته

بخرته كل الحته

كل الناس سأل فيني

شن بتسوي ..

يكفي المطر كافي فينا

شن بصلحو فقر الزمن فينا

بعيد هناك ما هماني

شن بقولوا أو بعيدوا

في شان ريد عيونك

بخرته كل الزمن

كلي أصيح

يا .. الله هووووووي

يا ... نبي ألله هووووووي

أحفظ  السمحة القمحة

أحفظ القمحة السمحة

أفرش سكتة عيونا بهجة

بعض منهم بتونس

كتير ردد معايا

بين ديل ويك تعلو الضحكة

كل ما تعلوا

أنا أصيح

أحفظ السمحة القمحة

كل ما يشاوروا

أنده .. يا ربي غطى عيونا السمحة

كل الناس وقفت معايا

سموك مليون مره

أنتي خماسية فيك باقي طرفي السادس

أفرده لها خير باكر

الزمن حاتل معانا

لا فاتنا

لا عده مننا شوية

ولا منك وصلت رسالة

لا جوال أتهزه شوية

زي المطر ..

العرق روى جسم

أتشبث بينا

كل عروق تدق

دق .. دق  .. دق

يشهد الله تقول نوبا

وأنا لسع بنده

أحفظ عيون السمحة

كل الناس الكانو  راحوا

والدنيا فاضت عليا

ما قدامي غير الوكت

العرق الصابي فيا

ندية خشمي

الله بحفظ

الله يحفظ

تلك السمحة

بين الظلمة الناس النائمة

أنا معاي ناس صاحية

 طلع الصبح ولسع يتمطى

عيني ما هبشه نعاس هسع

فجاء طلعت شمسك غطت الحته

كل العيون طالت فرحة

بهجة وحق

صبحت الأرض مليانه محنة

كل الزمن الراقد جنبي

ادخرته  لوكت تأني

لسعت عيناك وتلك السكة

شوفته كل عيون الدنيا

متل عينك ما شقيت طريقا

لسه فيها بلاقي

همس كل أفراح الهسع

بكره تأني بطلع بدري

لضوء  الشمس بقيف نقعد نعاين

وين من محلها بتطلع

ببراك .. وتكوني مكان ليا

بنده ربي وأزيد في صياح زياده

أحفظ تلك السمحة

يا .. ربي اسقي القمحة اسمحة

الوعد لسه مسافة

نمشيه كل مره شوية

والريد بفج  في عروقنا

20 نوفمبر 2013