جمالك
زي حاجه
وقت تدخلك
تدغدغ مسامات
رغبتك
تقعد في أنفاسك
تهب صوت العصافير
طعم الدندنه
توغلك
تخشك و تحضنك
ترجع مداخل رِئتك
تصبح شهقتك
تسكن حروف سكتك
تزَيَنْ عصافير بهجتك ...
جمالك
وقت يموج
تموج الدنيا
تمدد نيل
و تفرهد ضفة
صباح
يانع
باهي
يرسم الدنيا
جمال ألوان ...
وتدخل يا صباح الروح
زي لهفة خطاوي الشوق
وقت تسابق
بخطوة فرحة ميعاد
تشد انتباهك
تجبرك
عز سكتك
تخطف بالريد نظرتك
تزيد حاسة تلفتك ...
تمنحك زمن إضافي ممتد بالدهشة
وقت الفراق يناديك
يجذبك ويقعدك
يحتفل بحنين ذاتك
ورجعتك
وقتين تفوتك
تسرح بقصتك
زي أجنحة الغمام
وقت ترفرف
تغرق بمحض الزكرى
روح الماضي المستنيك
بين خطاوي الريد
و حواس زمن
توسدك مطر
يطوف بك
قوس قزح
تكون الحنين وفكرتك
تشتهي
تطلع من تاني
تفارق صمت فكرتك
تلوذ ...
بعيد ...
تجذبك بالمحال
و تجسدك
يسجد ليك النداء
كان ترضى وتعود
ترضى تكون
نسائم مطر ...
تخلدك ...
فرح فصول
طوق ياسمين
رقة بسمتك..
تحتفل بعودتك
جمال نسمة في خبايا
العرق المدسوس
لحظة يعلو و يكد
في زمن مجرور غصب
تناتل فيه ضحكتك فرحتك
عشان يصفى ويحن
يصبح
الليل دهشة النهار
كان نوصل ...
ونوصلك ...
أو نكونك
والزمن مخطب
بروح العِناد ...
كيفن نطولك
نحكي ونقول
في الوصف نزيد
الليل يجن
زي حكاوي عجوز
منتكيه على ثوب الشباب
في إنتظار زمانك يعود
قمراً يطوف
بدهشة الحكي العفيف
مشدود سمع الانفعال
الغضب متين يحن
ونتظرتك متين تعود
ترفع النداء شموس ...
الدنيا طلعت شمس
انتظرتك
أجنحة زمان
عشان أرحل معاك واكون
مدار وفصول
أعود مليان شجن
راسم ريدك وريد
تخطط شوقي
تسقيني صبر المسافة بشفتك
تمنح همس السنابل حصاد
تعرف كيفن
تفهرس الأرض
ترسم الإنتظار حمام
يبكي زخات المطر
دمعة دم في حضن الرمل
بعد تجرف المسافة لوعته
تشهق بحنين الذات
تمنح رضاها خصب الأرض
تغمض من الفزع عنينا
تدينا الثبات منهج
مداخلك ...
مسارب ضئ
اسرقك للضوء البعاين
كان يكفي يمسح الهم
بدخل ويفيض زياده ...
دخرتك لباقي السنين عمر
ترتب أيام الزمان
تحصد النجوم فكر
تخضر الشوق البكهرب
إشراقات فكرتك
منهج سكتك
إرتضيتك عز.الحال فرض
توجتك في عين الشمس
عرس
غنيتك ...
حجيتك ...
لهفة مسامع الريد
سنين لمحة المسروق
عرق يتوسد مفارش رمل
إتوانس مع نغم المطر
ضليتك ...
عمر طله
عادت سنينه جفاف
اتحكر مشدوه
في ضل الإنتظار
يعاين بين الماضي
الحاضر أيام
وصيتك ...
رعشة عرق
فاضت
تحلم بالأيام
يهتز حنينا سؤال
لقيتك ...
بدُر
ندى ضامي المسافة
وعد الدروب البعيده
فارش
تباشير الغمامه زاد
افترضتك للسحاب
لزمن البكر
لليله ما وصل
رسمتك انفعال
خارج نفس التربص
يوماً يكون الحساب
ولد ...
لمح الخروج
و إندثار صمة الكلام
اجيك .. رأجيك
ضامي الشوق وعد
فارش الإنتظار صبر
يتمدد يقيني يطول
طول شجر النخل
اسافرك
محطات
عدمانه
سنين الوجعه
ارجعك درب
هتاف شريان فج السكه
منح شوفنا حاسة أرض
ناغمتك
ناغمت المسافة
عشق ونسة خطاوينا
وقت تشرق
ترادف فوق رمل
المحرق شمس
ترفرف بجنحات فرح
ما ودرتك
ما غيبت دربك عِند
ما ضيع رجائي ريدك
ولا شمس الهناك غابت
الا في حضورك طلت
ولا روح بين نصين تاهت
رجعت في زفة نفس طول
اتحزمت للأشواق درب
سعن مليان ولف
مجرتق بعطر طيفك
موسم بالنيل والقمر
لسه حارني مالي بيني
وبين المسافة سؤال
عينيك وقت تتكلم
تسوق نسائم الحال
آخر الليل مشوار
يصادف خطواتنا
وقت تمشي لي قدام
نتربع جداول وجدان
تلاقح فراشات درب
أرجع من تاني
أخلدك للعشاق مقام
أزورك زي الأيام طواف
مجنونك
مهمومك
كل هاجس إفاضة قدومك
أدور بين لمحكِ وشروقك
ما مله قلبي الإنتظار
رأجيكِ
مستني عسل طيفك
كان إدفق منى الصبر
دخيرة رجاها سعن الإنتظار
رأجيك
في دروب الروح
وقت الباب يناغم نبض
لهفة الأنظار سؤال
أصحى وأجيك
تجاوني
خطاويك
حكاويك ...
لمحك يطل برق
بتاق ريدك
عاد الدرب باب عشق
شوق وكت يهب شجر
النيل لعينيك يتحزم صبر
رأجيك لدرب نهاية
أطوف أناديك
أطوف أناجيك
أطوف ألاقيك
طلت شبابيك الإنتظار
طلت شوارع المدن
تسامر قلبك زغاريدك
عودة الحقيقة فرح
خيلك خيالك
وبحرك أمان
عودة المسروق زمن
جمالك عروق إنسان
لحظك إنساني
نظرتك رقصة كحل
ساعدك جهاد خيلك
18 أغسطس 2016
