ضفة شوق
.......
بيني وبينكِ .. يا
بنية
وردة ساقيها الدهشة
ناس ضاميها لحاف الشوق
حنية
بسمة وحضنه .. لحظة
ندية
زي الفرح عيونم ضاحكه
ناساً في الناس دنياهم مٌغربية
فيها الجن .. الإنس
الطائر
برضو دعاوي المٌغربية
كل بخور فينا دايش
زي نهاراتنا الصيفية
زي لم يطش سراب
كمان عيونا تبكي
تعاين
يبقى جوانا الفرح
مكندك
كل الحلم
نسمات دغشية ...
أو وكتين تطلعي
تفتح صباحاتنا وردية
يهتف قلبي ليك ويعاين
وكتين عيونك تبق يا
السمحة
بفرح تقوم تشاغل
ببقى في الدنيا طائر
بين السماء وريحة
الوردة
مكذب وجودك جنبي
ولا الغيم سايقك مني
لما أشوفك مره
تبقى نغمة الدنيا
سعيدة
كل جرح يندمل مره
أحضنك وأقدل في
دربك
كل الفرحة تنطط عندي
حتى الناس تفرح بحظي
بيك أشرق مره أغرب
يا نجمة نيلية
يا قمحه مروية
يا نداء وهمس طوريه
يا نداء وهمس طوريه
يا هبت دعاش بين لحاف شجر
وكت خريفكِ ينقط ويكاوينا
المطر
زي العسل زهرك يفتح
يا نيل مليان حنين
بين جنبات قلبي
قيفك يفيض
شرياني وريد
ليك حبي يفيض
تغشاني شمسكِ
في كل الفصول
أعيشك ولف
أهاتي بيك فوق لنجوم
تطل شمس من جديد
أزرعك وادي فرح
أتحكر في جوفك
تسقيني همسات الولف
ترسميني في الزمن
السمح
تاخد ملامحكِ الطيور
تتغنى بيك بين النجوم
يا بنية جياني
من نفس الشجر
من مداخل كل الخريف
تحتويني
في الزمن الصعب
6 مارس 2014
ليست هناك تعليقات:
إرسال تعليق
يا مراحب