عشقناك حقيقة
::::----::::----::::
ساكنه جوانا الحقيقة
ما عشقانك من فراغ
والهم جية سحاب
يا مطيره صبي لينا
مدي ضرع النيل ثبات
القطاطي المليانه فرحه
ما يغشاها بحر السراب
تبقى الأمنية غيمة
تزرع شوق الحصاد
تفرهد القطية فرحة
تنبني عمارات السحاب
تضوي فصول القراية
جرعة لاطفال المهاد
حكيم للأسرة زاير
يرفض حق القعاد
ما عشقناك لمصالح
فينا اللي سجن ومات
الشهيد اللينا فينا
قدد توبه الرصاص
بسمك اتبسم ومات
كم شهيداً منه مارق
حلق فوق للغمام
ضوه بنورو الظلام
لحمل ماجاهو المخاض
عشان ناس جابر الصغار
يصبحوا باكر الميعاد
يبقوا الشجر الكبار
ما عشقانك انصاف حلول
تنملي فيها السجون
ترفع أعواد المشانق
والعسكر يفتش ضمير
ينهر وتاني يبيع
ويكتر رقيص المهازل
الجوع لينا يسوق
تبدأ مزادات التراضي
يسكر المداد بالكلام
تفتح أسواق الضمير
يعشش فوق لينا الغباش
ترهن المسافات خداع
عشقناك أغنيات
ترجع الوتر الزمان
تحفر جوه العصب ساس
سر جمالك والأمنيات
تلبس الشمس البتطلع
ثوب أجمل زفاف
يبشر العشق ألفينا
تخيط الرحط سحاب
تزرع الحب السلام
تبني المدن الخراب
تضوي من تاني الشمس
لا مهازل
لا سجون
تهجس أصوات البنادق
لا لعلعت رصاص تكون
عادل البراري
٥ اغسطس ٢٠٢٠
القاهرة
ليست هناك تعليقات:
إرسال تعليق
يا مراحب