ما حدثتك يا الحٓمدوُك
:::---:::---:::---:::
يا... الحٓمدوُك
سرك غرق بطنك
عمه طقه مدن وقرية
ونحنا ألفينا اللهب الأحمر
لسع بِنٓمهل صبراً صمتك
شن انجزت في عامك الأول
لا فصلته قعدت شرحته
قدر ما نقرب تبعد اكتر
يا... الحٓمدوُك
ما. ٍ. حدثتك وشافت عينك اكتر واكتر
جانا السوق يذبح ينهب
يلاوي الجيب منه يقلع
يشاور علينا بلسانو ويضحك
يشوفك تبكي ما بتضحك
تطش الرحمة من باب قلبك
تفقد معاها راحة قلبك
يا... الحٓمدوُك مكانك سر
بقت الماجي آكلة شعبك
حتى الزيت سعراً أسود
حتى السُكر صنقع ونطط
فوق لزانه نطط اكتر
وموية الصحة تنافس البيبسي
حتى الكهربا قعدت تقطع
ما جاءتنا من سد النهضة
والنيل الأزرق ماشي الدلتا
من سنار طالع يتفسح
يكندك فينا بالطمي الأخضر
ما حدثتك كل المزارع بقت عمارات
فلل ومخازن للانتونوف
يا... الحٓمدوُك
شالنا حلم الوعد الأخضر
ما فصلت وشرحته اكتر
لا انجزت الهم الأكبر
انقلب الحال أصبح مآسي
الحال الفينا صبح يلاوي
اتعشمنا وزدنا أماني
باكر يصبح قصص حكاوي
نتونس بيها في وكت خرفنا
يضحكو معانا أولاد أولادنا
يبقى أسطورة دهشة امه
نعيد فيها ونحكي مواقف
كيفن قطعنا السكة
خطوة ورا خطوة
شايلين الواقع فوق ضهرنا
يا... الحٓمدوُك
من أول عام جانا رمضان
كل الشهور بروح أبريل
كل عيد والحزن جديد
بين قصور وبيوت أشباح
ما كلمتك بالأشباح
ديل الناس الما ليهم اساس
كاتلين الروح داسين الرأس
دقناً بتق من كتاب الدين
جوه الجوهر بدون أساس
الغرقو الطلبة يوم العيد
في فت يوم مئتين شهيد
سال الدم من سبتمبر لعندي أبريل
غرق الشارع قبل العيد
يوم تلتين مايهك بعيد
بين الراديو وقنوات العالم
طلعنا عديل بلا تخدير
رددنا وقولنا لينا مطالب
دم الكوز القتل الطالب
باكر يبدأ الحكم المدني
ودوس الكوز مطلب شعبي
رسمنا شعار رددنا قولنا
لا تحرير
لا تعويم
لا بنك دولي
ولا تهميش
يصبح السوق في يد الدولة
والسعر السائد سعر الدولة
لا طفيلية ولا تمكين
والنار الفينا ما ولدت رماد
أولاد الثورة لجان تغيير
بمرصاد لكل عميل
في الحتانه أو شرق النيل
لجان مقاومة للتغيير
دم الشهيد إسمه أبريل
يسري في لجان تغيير
في كل عروق شباب الثورة
مواكب هادرة للتصحيح
من أمبده لفور برنقا
ختى القرى الفي همشكوريب
من الانقسنا لحفا قديم
ابناء الشعب وعي جديد
كل الرسائل للتذكير
الغالي الوطن ماليه بديل
ما فيهُ كبير
لا حميدتي وبرهان الدين
أبناء الجيش لحماية الثورة
جيشاً واحد ماليهُ شريك
لا مليشيات وتجار دين
يبقى الوطن مرفوع الجبين
عادل البراري
٢٠يوليو ٢٠٢٠
ليست هناك تعليقات:
إرسال تعليق
يا مراحب